تاريخنا الاسود
مقدمة
بسم الله الرحمن الرحيم
التاريخ الاسود لقيادة شعبنا بالماضي والحاضر
مقدمة لازم نحكيها
قبل ما ابدا اكتب بهاي الحلقات بتمنى من الجميع شي واحد بس
انه محدش يفكرني من المتحاملين على حركة فتح –يا سمح الله – بس للاسف خلال سنيين المقاومة كانت فتح هي الكل بالكل لهيك انا حاكتب عن السلبيات اللي حملتها القيادة تاعت منظمة التحرير وكيف اثرت على شعبنا
وانا هون باكد اني احد الناس اللي احترم كتير المناضلين الفتحاويين بالماضي والحاضر من ابو جهاد –خليل الوزير- لحد اصغر شهيد ومقاوم فتحاوي
بس هون انا حاكتب عن تاريخ اسود لكمن شخص اعتبروا من قيادة منظمة التحرير وحاولوا يحرفوا مسار التحرير لمصالحهم الشخصية –بس التاريخ ما يرحم وبيكشف كل شي-وباكدلكم انه بعد ما اخلص حلقات التاريخ الاسود تاع قيادة منظمة التحرير حبدأ بكتابة السلبيات اللي حملتها الحركات الاسلامية المتمثلة بالجهاد وحماس –يعني مش حاعتق حد - .
فكل الاحترام للشرفا الفلسطينيين الفتحاويين والحمساويين واليساريين
وكل العار لكل واحد وصل موقع قيادة بتاريخ شعبنا وسمح لحاله باستغلال هاد الموقع لمصلحته الشخصية .
وانا متاكد انه كتير حيستغرب من بعض الاشياء اللي حاكتبها بس كونوا على ثقة اني هون حاكتب التاريخ زي ما عرفته من كل الاطراف –الاردنية والفلسطينية واللبنانية- يعني مش حاحكي بلسان فلسطيني وانما بلسان محايد .
ويمكن شعبنا انظلم كتيربتاريخه بس للاسف كمان شعبنا عمل سلبيات كتير بتاريخه وبهاد الموضوع حابين السلبيات بس-يعني محدش يحكيلي وين الايجابيات لانو كلكم بتعرفوها ومفش داعي احكيها-.
وانا هون حاحكي التاريخ زي ما عرفته – مش زي ما انحكالي من الناس- لانو في كتير ناس بتفكر تاريخنا عبارة عن مجازر بمجازر زي ايلول الاسود وتل الزعتر وصبر وشاتيلا ( بس يا اخون لازم سالتوا حالكم يعني ايش السبب اللي كره الاردنية واللبنانية والسورية فينا وخلاهم يعملوا هاي المجازر ؟؟؟؟؟) هون انا حاوضح الاسباب زي ما عرفتها والله يوفقني واكون حيادي قدر المستطاع.
واخر شي انا يمكن اذكر بعض الاشخاص اللي البعض بيعتبرهم من المنزلين بالارض ومن المعصوميين بس يا جماعة هون بدكم تسمحولي لانو الحرية الشخصية بتعطيني الحق احكم على اي شخص زي ما بدي وحسب ما انا بشوفوا لهيك ما تنسوا هاد الحكي ومحدش بعد ما يقرا يستغرب ليش مثلا انا بحكي عن عبدالناصر وعن ابوعمار وعن كم واحد من اللي بيعتبروا نظاف هيك ( بس ومع احترامي الشديد لهدول الناس بس لازم ننتبه انهم غلطوا كتير بتاريخهم وغلطاتهم كانت كبيره كتير في مرات كتير ولازم نعرف مع بعض ايش هاي الاخطاء قبل ما نحكم عليهم ).
حنكتب التاريخ على حلقات
الحلقة الاولى
فكرة التاسيس ....انطلاقا من الكويت
طبعا كلنا بنعرف انه النية الاولية لقيادة فتح كانت شريفة ومتبعة مبدا واحد تحرير فلسطين وكل فلسطين ,واول من فكر بتاسيس حركة فتح كان الزعيم المصري جمال عبد الناصر,فالاخ عبد الناصر كانت القضية الفلسطينية منشفة ريقه وعامليتله عسر هضم ووجع راس كل يوم والفلسطينية مجنينيه بحكيهم وانو لازم تدافع عنا ولازم تحمينا ,وفوق كل هاد كانت امريكا واوروبا مزهقيته ومطلعة روحه وكل يوم تحكيله سيبك من هدول الناس واوعك تقرب على الفلسطينية واياك ثم اياك تتدخل فيهم .....وفوق كل هاد كان المسكين عبد الناصر عندو مصيبة ولكل المصايب هي الاخوان المسلمين اللي نزل فيهم قتل وحبس وتشريد وبصراحة الزلمة عمل فيهم البدع وما قصر وكان الفلسطينية خايفين انه جمال عبد الناصر يقلب علينا ويروح عامل فينا زي الاخوان ,,,لهيك وبيوم من الايام خطرة فكرة براس زعيم العرب عبد الناصرفراح جمع شوية شباب فلسطينية بس ايش شباب كانوا رجال فعلا وخلا فيهم ابو تنين ولا تلات مش نافعيين, لشغلة بباله محدش عرف بوقتها ايش هي , بس للامانة غالب اللي جابهم جمال كانوا رجال وشرفا وجماعة جايين يجاهدوا ويحرروا فلسطين ومش اي شي تاني .
وبعملة جمال هاي ,الله يسامحه عليها , نقل قضية فلسطين من الملعب الكبير للملعب الصغير , يعني بعد ما كانت قضيتنا اسلامية بامتياز وبتخص كل المسلمين ,راح جمال عاملها قومية وبتخصش غير العرب وكان هاد اول ضربة تحت الحزام للشعب الفلسطيني من جمال عبد الناصر .
وبيوم من الايام جمع جمال عبد الناصر هدول الشباب وكان معاه وقتيها زلمة اسمر ,وحكالهم اذا بدكم يستمر الدعم العربي والمصري الكم لازم هاد الزلمة يكون معكم , وطبعا الجماعة بطيبة نية وافقوا ومحدش وقتها عرف ايش قصد زعيم العرب وليش فرض على الثوار هاد الزلمة الاسمر .
طبعا هدول الشباب وباقتراح من الزعيم عبد الناصر خططوا لعملية بعلبون التاريخية علشان يدخلوا دخلة قوية على الشعب الفلسطيني والناس تحبهم من اول نظرة زي ما بينحكى ,
وحسب المصادر التاريخية كلها كانت العملية مفبركة ومصورة ومراحش فيها كتير قتلى زي ما اعلنوا بس كانت مدعومة اعلاميا بشكل مش طبيعي وبخاصة من الراديوهات العربية ( هنا القاهرة وهنا عمان وهنا دمشق وهنا ....) وبعد هاي العملية مباشرة وبتاريخ 1/1/1965 كانت الانطلاقة الرسمية لحركة فتح اللي بالحلقة الجاية حكاكتب عنها .
-----------------------------------------------------------
الحلقة الثانية
الحلقة التانية
انطلاقة حركة فتح
بعد ما عرفنا بالحلقة الاولى كيف انطلقت فكرة تاسيس حركة فتح من الزعيم المصري جمال عبدالناصراليوم حنعرف كيف كانت الانطلاقة الرسمية للحركة
طبعا بعد ما بلشت الحركة تنشهر كحركة تحرير فلسطينية ,بلش كتير ناس تسال يعني كيف حركة تحرير فلسطينية وموجودة بالكويت ؟؟؟؟
يعني الكويت بلد خليجي وصغير وبعيدة عن فلسطين يعني من الاخر مش مقنعة كتير ...
لهيك كان القرار بالتوجه ناحية الاردن, ويجوز هون تسالوا وليش الاردن ومش غيرها ؟؟طبعا الاردن كانت انسب شي لانها اقرب بلد واكبر حدود مع فلسطين وغير هاد كله كانت مليانة فلسطينية وبهداك الوقت كان الملك فيها صغير ونظام الحكم ضعيف ,,,لهيك بعد الانطلاقة مباشرة الجماعة حملوا حالهم وراحو الاردن ومش عارف التاريخ بالزبط بس بتصوري انه هاد الحكيصار باوائل 1966 يعني بعد سنة من الانطلاقة اللي كانت ب 1/1/1965 .
وهناك بالاردن زبط الجماعة حالهم وعملوا معسكرات تدريب للشباب وعملوا شغل جامد وبيرفع الراس ,,,,وبصراحة بالاول الشباب كانوا ماشاء الله عليهم ومتربيين كتيركويس ..وكانوا مشتاقيين للجهاد وقلبهم متعبي على اليهود ,,,ومن الاخر الجماعة بفترة قصيرة حكموا البلد وفرضوا سيطرتهم عليها لانو النظام كان ضعيف زي ما حكينا ...لهيك حكموها زي كانها فلسطين وزيادة.....وبعد هيك صارت المصيبة الكبيرة اللي اسمها نكسه.
وبعد ما كان الجماعة مطالبين بتحرير نص فلسطين صاروا مطالبين بتحريرها كلها ...وخلال 6 ايام من مسرحية اسمها حرب 67 العرب الله يبارك فيهم سلموااللي ضل من فلسطين وانتكسوا ونكسونا معهم .
وهون معظم الشباب اللي كانوا نفسهم يجاهدوا انتكسوا ويئسوا وكان الكتير منهم يفكر بالانتحار – الله يكون بالعون بصراحة الي صار وقتها مش قليل – بسالقيادة وقتيها عملت اشي صح وردت عملت قواعد جديدة ومعسكرات جديدة للشباب وصاروا يتدربوا بالاردن تحت لواء الاخوان المسلمين وهاد الشي خلاهم يتماسكوا اكتر من قبل ومع الايام كبرت حركة فتح وكبر معها حب الشعب الفلسطيني الها وبعديها كان الفلسطينيين مع موعد ومعركة جديدة مع اسرائيل وهي معركة الكرامة اللي لعبتدور كبير بتاريخ الجماعة حتعرفوه بالحلقة التالتة والي حتكون عن معركة الكرامة .
الحلقة الجاي حنحكي كيف ساهمت معركة الكرامة برفع اسهم فتح وزيادة محبة الشعب الفلسطيني الها .
-----------------------------------
الحلقة الثالثة
معركة الكرامة
بعد ما عرفنا بالحلقة اللي فاتت كيف تاسست حركة فتح اليوم حنحكي عن الظروف اللي ساعدت بزيادة حب الشعب الفلسطيني لهاي الحركة الي كان وما زال فيها رجال كتير من اشرف ابناء الشعب الفلسطيني .
يمكن اهم حدث صار بهاي الفترة كانت معركة الكرامة اللي ساهمت بشكل كبير بشهرة فتح على المستوى العربي والعالمي وخلت اسهمها بالسما عند الفلسطينية .
طبعا بعد نكسة 67 وبعد ما كان الشباب مصدومين ومنهارين نفسيا , اعرفنا انه القيادة ردتجمعتهم بمعسكرات جديدة تحت لواء الاخوان المسلمين بالاردن ,,وكان وقتيها الشباب اخلاقهم عالية وحلوة وكانوا متمسكين بالدين وحبل الله وقدروا يعملوا عمليات كبيرة وممتازة ويخسروا اليهود خسائر كبيرة بالعتاد والارواح وكان في شهدا كتير بين الشباب يعني باختصارالجماعة عملوا شغل جامد كتير على الحدود وقتيها ,,,,زي ما نحكي حرب استنزاف يعني .
وبعد هيك وبعد ما شبابنا جننوا اليهود قررت اسرائيل الهجوم وشن حرب جديدة على هدول الفدائية ..وكانت هاي معركة الكرامة .
وبهاي المعركةالكبيرة كان في تدخل للجبهة الشعبية تاني اكبر تنظيم فلسطيني بهداك الوقت وكانت الجبهة لواء من الوية الاردن زي فتح .
وبهاي المعركة الشباب ما قصروا وفرجوا الجيش الاسرائيلي النجوم بعز الظهر وخسروهم خسائر كارثية بالمقياس العسكري الاسرائيلي بالعتاد والارواح يعني كانت خسائراسرائيل جرحى وقتلى بالمئات .
وبهاي المعركة كان في تدخل للجيش الاردني ,هوبصراحة مش كل الجيش تدخل يعني بس لواء من الويته تدخلت وبشكل كبير بهاي المعركة ,وهاد اللواء كان لواء مدفعية وساعد الفدائيين من فوق الجبل مساعدة كبيرة كتير .
وهيك اندحر اليهود وانهزموا باول خسارة فعلية الهم بتاريخ الصراع مع العرب ومع الانتصار هاد ارتفعت مشاعر الفدائيين للسما ....ورجعت ثقتهم بنفسهم ..ورجعت معها ثقة الشعب الفلسطيني وكل الشعوب العربية بالنصر على اسرائيل بعد ما فقد غالبيتهم الثقة بعد حرب 67
.
وبالحلقة الجاي حنعرف كيف بلش الشباب الفدائية باول خطوات الانحراف عن الطريق الصح .........
-----------------------------------------------------------------------
الحلقة الرابعة
بداية الانحراف
عرفنا بالحلقة اللي فاتت كيف ساهمت معركة الكرامة برفع اسهم حركة فتح بين الناس وزيادةالاقبال الشعبي عليها واليوم حنعرف كيف بلش الشباب الفدائية اول مراحل الانحراف.
بصراحة بعد النصر الكبير على اسرائيل بمعركة الكرامة كان الشباب الفدائية فرحانين بنشوة الانتصار ,والي شارك بالحرب واللي ما شارك صار كله بطل وكله صار مناضل,وكل الفدائية صاروا ينقلوا قصص عن هاي الحرب احيانا تكونصح واحيان كتير تكون خيالية ومبالغة ,واهم شي بعد هي المعركة اكتسبت حركة فتح احترام جميع الفلسطينية وبلش كتير شباب اجوا من الضفة وغزة والاردن وسوريا ولبنان ينضموا للحركة وكل واحد حاط بباله امل معين , فمنهم اللي كان يطمع بمجد زائف ومنهم اللي كان بدو يصير بطل والشريف اللي كان هدفه الجهاد وتحرير بلده ومنهم الحرامي واللي بدو يفرد عضلاته على عباد الله واللي بدو يضيع وقته ...المهم مع كترة الشباب اللي انضموا لفتح بهديك الفترة بلشت ملامح الانحراف تبين بين الفدائين .
وبلشت المصاري تنزل زي الرز على الحركة من الفلسطينية الاغنياء والدول العربية ودول الخليج وصار كتير ناس ينتموا لفتح منهم اليساري والشيوعي والاخوان والمسيحي وكل من هب ودب وصارت الحركة مخلطة بطريقة غريبة.
ويجوز تسالوا ليش الشباب اليسارية والشيوعية ينتموا لفتح مع وجود الجبهة الشعبية والحزب الشيوعي ,هون كان من الواضح انه المصاري لعبت دور كبير ,فالجبهة صحيح كانت يجيها دعم من الدول السوفيتية والشيوعية بس مقارنة بفتح كانت ولا اشي من الناحية المادية ,وعشان نوضح الفكرة اكتر يكفي نعرف انه الفدائي كان ياخد مرتب شهري 25 دينار بينما الاستاذ بالاردن ما ياخد غير 16 دينار يعني المصاري كانت بالهبل عند فتح بهديك الفترة .
وهيك كبرت الحركة وتوسعت وصار يدخلها الشريف والوسخ والحامض والحلو والمناضل والعميل والحرامي والمستفيد واللي بدو ينهب وهون بلش الدمار والخراب.
لانه مع كترة المصاري بايد المناضلين الشباب استبدوا وافتروا عن صحيح ,واستعبدوا الشعب الاردني بارضه واشتروا السيارات والفيلات والعمارات وصاروا يلبسوا احسن ملابس وتحكموا بالشعب الاردني لحد ما كان الاردني بنضرب بالشارع وتنأخد منه سيارته وماحد يتدخل .
واللي زاد الطين بله انه الاردنية كانوا اقلية بهديك الفترة والملك كان ضعيف, وبصراحة هاي الاعمال استفزت الملك حسين وكان بدو يعمل اي شي عشان يخلص من الفدائية اللي عندو حتى لو تحالف مع الشيطان نفسه ,وعشان نكون صريحين كان معه حق لانه سفالة الشباب وقتها وصلت حد ما ينسكت عنه .
وهيك كان التاريخ بيكتب بداية انحراف الشباب عن طريقهم الاول
وبالحلقة الجاي حنحكي عن ايلول الاسود...وايش جنت فتح على حالها وعلى الجالية الفلسطينية بالاردن بسبب عمايلها الوسخة .-------------------------------------------------------------------
بسم الله الرحمن الرحيم
الحلقة الخامسة
ايلول الاسود
عرفنا بالحلقة اللي فاتت كيف بلش الشباب بطريق الانحراف ....يعني بعد النصر اللي حققته حركة فتح بالكرامة صار كتير شباب ينضموا الها ...وطبعا اهدافهم كتيرة يعني اشي بدو يجاهد واشي بدو مصاري ....وكان منهم اللي بدو يتزعرن وبدو ظهر قوي يحميه ...وننساش انه المصاري الكتيرة اللي وصلت لفتح بهديك الفترة ساهمت بتخريب النفوس وقلة التربية ...وهون انا اكيد انه لو التاريخ رجع فينا كان تمنت فتح لو انه معركة الكرامة ما صارت ...لانه المصايب اللي ترتبت عليها وبعديها كانت اكتر كتير من الفوائد بالنسبة للفدائية.
بعد نصر الكرامة وبعد ما
كبرت الحركة كتير وصار من هب ودب يسجل فيها ..وزاد الدعم المادي اكتر من اللزوم
للفدائية ....الشباب افتروا على اخوانهم الاردنية وفرجوهم النجوم بعز الظهر ..ومش
بس الاردنية لأ وكمان على الفلسطينية التانين ...
عربده و فساد و قلة ادب و اخلاق زي الزفت و الشباب طبعا طمعوا نسيوا القتال و صاروا
يفتشوا عن السيارات الفاخره و الفيلات و الفساد و الامتعه و الابراج و الفنادق
بعد ما كانوا يناموا علي فرشه مصديه و حصيره معفنه صار بدهم ريش نعام..
وبعد هيك الملك حسين قرف من تصرفات الشباب وكان بدو اي طريقة عشان يتخلص منهم ويريح راسوا من قرفهم ..وبصراحة هون الملك حسين اثبت رغم صغر سنه عن شخصية سياسية من طراز رفيع بتنخلق ...وكان تصرفه اكبر دليل على هيك ..
الملك حسين راح لعبد الناصر الزعيم المصري واقنعه انه الفدائية لازم يطلعوا من المدن ويروحوا على مكان بعيد عن المدن يتدربوا فيه منيح ..وهيك اقنع عبد الناصر الفدائية بالانتقال لجرش عشان يجهزوا حالهم للمعركة الفاصلة مع اسرائيل – المعركة اللي لهاد الزمن ما صارت للاسف - .
وطبعا عشان جمال يضمن الطاعة التامة من الفدائين ..هددهم انه حيقطع الدعم والمصاري العربية عنهم اذا رفضوا القرارت ...ومع انه التوجه لجرش ما كان اله مبرره بحكم بعد منطقة جرش عن الحدود ..ولانها منطقة مفقتقدة لكل معالم الحياة بهيك الفترة – ويمكن لايامنا هاي كمان – بس برضه الشباب ما كانوا يقدروا يحكوا لأ ..خوف ما يتوقف الدعم العربي...واكيد ما كان حدى من الفدائية مستعد يرجع ينام على الحصيرة بعد ما تعودوا على المصاري الكتيرة والعز وريش النعام .
وهناك وبعد ما تم تجميع الفدائية بمكان واحد بجرش ...بلش مسلسل ايلول الاسود وبلشت المدبحة العربية الاولى بحق الشعب الفلسطيني ...وكان الهجوم متعدد الاطراف ..يعني مش بس الجيش الاردني هجم على جرش ..لأ ...اطراف كتير هاجمت جرش وبالحلقة الجاي حنتكلم عن الاطراف والعوامل اللي ساعدت الاردنين بايلول الاسود .
---------------------------------------------------------------
بسم الله الرحمن الرحيم
الحلقة السادسة
كيف استطاع الملك حسين اخراج فتح من الاردن؟
عرفنا بالحلقة اللي فاتت كيف بلشت مشاكل ايلول الاسود ...بس ما عرفنا مين اللي بالزبط هاجم الفلسطين بايلول ...المنطق بصراحة بيحكي انه الجيش الاردني بهديك الفترة بيقدرش يحارب الفلسطينية لحاله ...بحكم العدد الكبير للفلسطينية بالاردن وبحكم العلاقات الوطيدة بين الشعبين وبحكم الدعم العربي ولاسباب كتيرة كلنا عارفينها ..هون السؤال اللي بيطرح نفسه مين ساعد الاردنية بالهجوم ؟؟؟؟.
المقاومة بالاردن ووجود الفدائية على ارضها كانت عاملة مشكلة كبيرة للنظام الحاكم بالاردن .. وبخاصة بحكم العلاقة الوطيدة بين النظام وبين بريطانيا ...بس المشكلة انه ماكان بامكان النظام الاردني يطرد الفلسطينين بهديك الفترة لانه لو طردهم كان الدنيا قامت عليه وما قعدت والعرب اتهموه بالخيانة واشياء كتيرة كان بغنى عنها .
وهون اشتغلت العقول العربية والامريكية والبريطانية والاسرائيلية وفكرت بطريقة مناسبة عشان يبعدوا المناضلين عن الاردن وعن مناطق التماس مع اولا العم اليهود...وكانت الخطة الموضوعة تنقسم لقسمين حسب ما وضحلنا التاريخ بعدين ...
اول قسم كان اغراق حركة فتح والمناضلين بالمصاري ,,,والقسم التاني كان انهم يشتروا ذمم بعض الشباب الفدائية ويخلوهم يشتغلوا جواسيس وعملاء.
وبالنسبة للقسم الاول من الخطة فطبقوه الجماعة بحذافيره ...يعني كان راتب الموظف بالاردن 10 دنانير والاستاذ 16 دينار والدكتور ما ينط عن 20 دينار ....راحوا خلوا راتب الفدائي 25 دينار للجندي و30 دينار للقائد وهون انتوا لاحظوا الفرق الكبير بالرواتب بين الفدائين وبين الناس العادين !!!وزي ما احنا عارفين المصاري بتخلي الانسان يفتري على الناس وصار الفدائية يستثمروا مصاريهم بالشركات والشغل وسابوا المقاومة وتوجهوا للتجارة وكسب المصاري .وبصراحة هاد الجزء من الخطة طلع تمام لانه خلى كتير من الشباب يقوموا باشياء مش ولا بد ويعملوا اشياء غلط كتير بالاردن تسجلت عليهم كنقط سوداء بعد هيك عند العرب .
وبعديها صار مؤتمر السودان اللي حكم على الفدائية بالحبس باحراش جرش وإلا العرب بيقطعوا المصاري عنهم ...وهناك بجرش كان اصطيادهم اسهل لانهم متجمعين بمكان واحد بعيد عن السكان .
وبعد هيك وبعد ما اطبق الجزء التاني من الخطة اللي يقوم على شراء ذمم بعض الفدائية ...بعديها صار النظام الاردني يلعب على وتر الصراعات الداخلية داخل فتح ومين يقود المقاومة ...وللاسف كانت الصراعات كتيرة وكان الزلمة الاسمر اياه – كلكم عارفين مين هو- قائد لفتح بس برضه كان كتير من الفدائيين ما يحبه لانه التاني الله يرحمه كان الو حركات زعرنة ويحب القيادة ..
وهيك توفرت كل العوامل اللي تساعد على طرد المناضلين الفلسطينين من الاردن ...وبليلة ما فيها ضو قمر بلش الهجوم اللي شارك فيه اضافة للجيش الاردني كتير اطراف عربية مجاورة وبمساعدات اوروبية وما ننسى المساعدة الاهم من اولاد العم !!!
واجت ساعة الحسم وصارت مجزرة ايلول واستشهد كتير فلسطينين ...وهون صارت مشكلة بين اللي خططوا للمجزرة وبين حبايبهم بين الشباب الفدائية ..وكانت المشكلة الكبيرة هي كيف بدو يطلع الزلمة الاسمر – الله يرحمه – من الاردن ؟؟وهاد اشي مستحيل قدام عيون الشعب الاردني اللي كان محمله مسؤولية الزعرنة والمشاكل الاهلية بين الاردنية والفلسطينة ...لهيك كان الشعب الاردني كله بيستنى خبر مقتله او اعتقاله وكان تهريبه بشكل مباشر حيخلي النظام بوضع محرج قدام الشعب ...والمشكلة انحلت بطريقة غريبة.,,
القذافي ما غيره الاهبل تاع ليبيا اتدخل ...ولبس الزلمة الاسمر لبس وحدة منقبة وطلعوا من الاردن ...وطبعا الاردنية عملوا حالهم مش شايفين وخلوا الزلمة الاسمر يهرب من الاردن .
وهيك انتهى ايلول الاسود وانتهت زعرنة شبابنا وقيادتنا بالاردن بجرح عميق بين الاخوة الفلسطينين والاردنين ...وبالحلقة الجاي حنعرف ايش صار بمرحلة ما بعد الخروج من الاردن .
------------------------------------------------------------
عن قريب حنكمل الحلقات ....ضيف بريدك بالقائمة البريدية عشان نعلمك بكل جديد للموقع