خبر وتعليق

خبر وتعليق 10
اهلا وسهلا فيكم من جديد
خبرنا اليوم فلسطيني مية بالمية ,,,لا ومن العيار الكبير لانه بتعلق باكبر طرفين – بعيد الشر – في الساحة الفلسطينية
الطرف الاول هو الرئيس الكبير البطل الايراني المجاهد قائد حركة التحرير والقوات المسلحة الفلسطينية ووووو,,,,,,واتفقنا قبل هيك انه القابه بيكفيهاش ساعتين عشان نحكيها لهيك راجعوا مواقع حركة فتح لتعرفوا القاب عمو ابو مازن ,,,,والطرف التاني بقيادة امير المؤمنين وخليفة المسلمين والمهدي المنتظر وووو,,,,- على فكرة كمان شوي ولولا العيب بيصير رسول ونبي كمان – هاد الزلمة هو اسماعيل هنية ,,,
طبعا الخبر اللي حنحكي فيه اليوم هو المبادرة اليمنية لتوحيد الصف الفلسطيني
طبعا بعد ما زهقنا من الفضائيتين ,,,تلفزيون فلسطين واللي بيوقفش حكي عن حركة حماس وبوصفهم للحمساوية بالانقلابين وبيحسس العالم انه الناس بغزة قاعدين تحت حكم نازي مش تحت تصرف جماعة كلها على بعضها بتزدش عن 20 الف مسلح مقابل اكتر من مليون ونص فلسطيني بغزة – يعني زدتوها يا تلفزيون فلسطين - ,,,والفضائية التانية واللي اسمها تلفزيون الاقصى – لا اسمه فضائية الاقصى وهم حاطين صورة قبة الصخرة يعني من الاخر مسخرة – هاد الاقصى بيوقفوش عن الطخ بحركة فتح والسلطة ودايما اخبارهم بتحكي عن مخابرات عباس فياض ووقائي دحلان ,,,,,,المختصر من هاد الحكي انه الفلسطينية فقعوا وبطلوا يتحملوا القرف الكبير من الطرفين ,,,,وعشان يخلوا الشعب يدخل باللعبة من جديد طلعولنا بتمثيلية اسمها المبادرة اليمنية – والله لو عملوها برمضان ما زعلت كان تسليت بس مش وقت الامتحانات يعملوها والله عيب هيك – هاي المبادرة الي بدهم يوحدوا فيها فتح وحماس – مع اني بتصور بعد اللي صار والي بيصير انه لو النبي من فوق ينزل ما عمل اشي مع الطرفين عشان يجي علي عبدالله صالح يصلحهم , واصلا هاد الرئيسي اليمني عندوا مشاكل اهلية بمحافضة صعدة واتباع الحوثي عاملينلوا قلق فبراي انه يروح يصلح بين شعبه بعديها يخرجلنا تمثيليات,,عفوا قصدي مبادرات – ’’’

بعيد عن المسخرة خلينا نرجع للموضوع شوي ,,,انا شايف انه الفرصة الاخيرة لمجاهدين حماس ومناضلين فتح هي الفرصة اليمنية ,,,وطبعا اليمن بيتميز عن غيره ,,ننساش انه ارض القات ,,,وهيك بنضمن بعد حفلة تخزين قات صغيرة انه الجماعتين ينسوا اللي صار – وينسوا ابوهم كمان - ,,,,وننساش انه بين الجماعتين في دم ,,والدم ما بينمحى الا بحسن النية – او حسن تخزين القات ايهما افضل - ,,لهيك ان شاء الله يتفق الطرفين بهاي المبادرة ويطلعولنا بلعبة جديدة غير لعبة الدم والموت ,,,وانا بشوف انهم يجربوا البلياردو – والله لعبة منيحة وبدهاش لياقة من عباس وهنية - وازا ما عجبهم البلياردو وبدهم لعبة بتسلي اكتر وفيها طخ ودم – بس عن كذب – فما ألهم الا عسكر وحرامية – بس المشكلة مين العسكر ومين الحرامية – وانا شايف جماعة فتح بقيادة الايراني عباس افضل من جماعة حماس بقيادة الخليفة هنية للعب دور العسكر وبخاصة انه السلطة اخدت الاذن من عمو اولمرت – الله يخليلكم اياه اولمرت يا عباس اللي والله قاعد بيتعب حاله كتير عشان يبيض وجهك الاسود – انهم ينزلوا 20 الية مصفحة – بس من غير رشاشات لانه عمو اولمرت لساته مش ضامن البهائي عباس ,,,وانا بحكي لاولمرت اطمن يعني لو اعطيت عباس وزلماته نووي والله ,,,ما راح يلمسوا اضفر ولد اسرائيلي الجماعة محترمين وبيحبوا وطنهم اكتر ما بنتصور اكتر بكتير ...-وهيك بتكون المشكلة بين حماس وفتح لقت حل سريع من العبد لله ,,,

بس انه الطرفين يروحوا اليمن ويشربولي فنجان قهوة بقصر عبدالله صالح ويقعدولي بفنادق على حساب الشعب اليمني المسكين وبالاخير يرجعوا ايد قدام وايد ورا فهاد الاشي اللي بيقبلوش ولا فلسطيني ’’’’’وبنساش احكيلكم انه شعبنا كره هاي الشغلة ,,وكره التمثيليات – قصدي المبادرات – الي بيطلعولنا اياها كل كم يوم والشعب المسكين بيفرح فيها ,,,,وبالاخير بتطلع فشنك ,,,,لهيك اذا المبادرة اليمنية ما جابت نتيجة انا بفضل انه الجماعة الي هناك ما يرجعوا ويفرجونا وجوهم بفلسطين كل واحد يروح على اقرب بلد اله – يعني تاعين السلطة بيرجعوا على اميركا ولا عند اليهود وتاعين حماس على سوريا ولا ايران –وخلى الشعب يسطفل بحاله وهو اكيد ادرى بمصلحته ,,,

بعدين قبل ما اخلص الي رجاء حار للجماعة ,,,تاني مرة بس بدكم تعملولنا تمثيلية ما تخلوها يمنية – والله اليمنين مش شاطرين بالتمثيل – لهيك خلوا المبادرة بسوريا – السوريين ملوك التمثيليات – ونشوف تمثيلية سورية احسن الف مرة من وحدة يمنية ولا ايش حكيتوا ’’’’

ولعبة الكراسي هادي خلص فكونا منها ,,,,من الاخر قرفنا منها ,,, وانا شخصيا من زمان بكره لعبة الكراسي ,,- من يوم ما الاستاذ بالصف كان مستلم الطلاب وبيحكيلهم جيبولي كرسي من الصف اللي جنبنا عشان اقعد- وانا بحس انها لعبة فيها تسلط على الناس والشعب ,,,

وان شالله الله يديم المحبة بين اخوانا بفلسطين
وعاشت حماس وعاشت فتح وعاشت الجبهة وعاش الجهاد
بس الاهم من كل هاد عاشت فلسطين حرة وعاش اعظم شعب شعب فلسطين حر ,,,