خبر وتعليق

رسالة من فلسطيني مسلم الى الرئيس الامريكي القادم باراك اوباما

مع اني بكره  اكتب باشي غير السياسة الفلسطينية ,,,وبس موضوع اوباما دخل بالدين الاسلامي لهيك سمحت لحالي اكتب هاي الرسالة للمظلوم اوباما واللي اتهموه بعض الامريكيين بانه مسلم – يالطيف – وانا برسالتي حاعطي العم اوباما كمن طريقة ما يخروش المي عشان ينسف الشائعات اللي جلطونا فيها التلفزيونات والانترنت وكلهم بيحكوا عن الزلمة هاد انه مسلم – يا سمح الله – وبدهم يخربوا مستقبله كزعيم لاعظم دولة بالعالم ,,,

عم اوباما كتير الاخبار اللي بتحكي انك اسلمت واشي بيحكي انه والدتك العزيزة متزوجة من مسلم اسمه حسين- يعني قلت زلام مسيحين ويهود واله الوالدة غلطت- ,,,وجرايد بتحطلك صورة وانت بتزور الصومال – اي والله بتستاهل اللي بيصرلك مش لاقي تزور غير الصومال من البلاد الاسلامية – ولابس زي عربي ,,,يعني من الاخر التهمة لابسيتك لابسيتك ,,,لهيك خد مني كم نصيحة والك مني ولا امريكي بعدها يحكي عنك انك مسلم ولا يحزنون ’’’’

اول شي لازم تعرف اني حانصحك لوجه الله ومش لاي مصلحة ,,,اصلا انا كل همي اني بس بديش تدخلوا الاسلام بلعبة الانتخابات تاعتكم بيكفيه الي هو فيه ,,,وتاني شي لاني مهتم اكتر منك اني اثبت انك انت مش مسلم ,,,لانو من واقع تصريحاتك بيشرفش الاسلام وجود كلب متلك فيه – اسمحلنا على المسبات يا اوباما بس بدك تستحمل - ,,,

وعشان تقنع الناخب الامريكي بانك مش مسلم وانك زلمة مسيحي ابن كل,,,قصدي ابن مسيحي وبتحب اليهود اكثر من اي شخص تاني لازم تعمل الاشياء هاي ....

1- روح بزيارة عاجلة ومفاجئة لاسرائيل واعلن انك بتدعم وجودها كدولة يهودية واتهم الارهابيين والاسلاميين المتطرفين من حماس والجهاد بالوقوف بوجه عملية السلام وحملهم سبب العنف الدائر بالاراضي الفلسطينية ,,,وادعم حق اسرائيل ببناء الهيكل المقدس ,,,وعشان تحبكها صح احكي انه بنت عم خالة بنت عمة ابوك يهودية ,,,

2-من تل ابيب وبنفس اليوم خد اول طيارة على شركة العال للطيران من تل ابيب لكوبنهاجن بالدنمارك واعمل مقابلة صحفية لجريدة – جيلانديس بوستن – واحكي عن دور حرية التعبير بتقدم الامم وتنساش تحكي انك معجب بالرسوم اللي عملت المشكلة الاخير بالدول الاسلامية ,,

3- من كوبنهاجن خد اول طيارة طالعة على لندن وهناك قابل الكاتب البريطاني الهندي سليمان رشدي ,,,واعمل مؤتمر صحفي انته واياه وتنساش تطلب منه قدام الكاميرات يقرء شوية مقاطع من كتابه- ايات شيطانية -,,,وتنساش تطلب منه نسخة من الكتاب موقع عليها كهدية قبل ما تروح ,,,

4- من لندن روح على روما ومنها لفاتيكان وهناك قابل البابا وخلال المؤتمر الصحفي احكي انك تاثرت كتير بالحكي اللي حكاه البابا عن الاسلام السنة الماضية وانه فتح عينك على حقيقة الاسلام المتطرفة ,,وتنساش تصرح بانك تمنيت لو كنت من الي حضروا هاي المحاضرة التاريخية للبابا

4- ومن هناك خد اول طيارة للهند وهناك اعلن دعمك لحصول الهند على مقعد دائم بمجلس الامن ,,,واوعك تنسى تحكي عن احقية الهند باقليم- جامو وكشمير - ,,واحكي عن قلقك من التطرف الاسلامي المتنامي بباكستان وافغانستان وتاثيره الضار على دولة الهند الصديقة الوفية للولايات المتحدة ,,

5-وبس ترجع على امريكا وقبل ما تغير اواعيك اطلب من مرتك ميشيل تتصل على الكاتبة الصومالية – ايان حرزي علي- المعروفة بتهجمها الدائم على الاسلام ,,وادعوها لعمل ندوة مشتركة عن المراة بالاسلام ,,واللي اكيد الكاتبة الصومالية العزيزة حتنظمها كالعادة تحت رعاية – اميريكان انتربرايز – ونوادي الروتاري ومؤسسة فوكس نيوز  ,,,

6- اتصل شخصيا برئيس منظمة ايباك الصهيونية المتطرفة- هاوارد فريدمان  اذا ما خانتني الذاكرة- وهنيه على الجهد العظيم الي بتقوم فيه منظمته بتوطيد العلاقات الامريكية والصهيونية ,,,واحكيلوا انك بتحب تكون من المتحدثين الفعالين باسم المنظمة ,,,,وتنساش تعزمه على عيد ميلادك الجاي بشهر 8 ,,,,

7- اوعك واياك وحذار ,,,,انك تعمل اي اتصال بمنظمة كاير الاسلامية ...واعتذر عن اي دعوة منهم لالقاء كلمات اثناء المحاضرات ,,

8- عينلك كمن محامي – والافضل يكونوا يهود – وخليهم يرفعوا دعاوي قذف وتشهير ضد اي جريدة ولا موقع انترنت بيحكي انك مسلم ,,,وطالهم بتعويضات كبيرة عشنهم جرحوا مشاعرك بانهم اتهموك انك مسلم ,,,

واذا ما زبطت كل هاي الاشياء بانها تنسف اشاعات انك مسلم ,,,فمالك انك تقلب الطاولة عليك وعلى اعدائك ,,,واعمل مؤتمر صحفي كبير وقول انك قررت تكون صادق مع الشعب الامريكي وبدك تصارحه بكل الحقائق ,,,وطبعا كلهم بيفكروك بدك تحكي انك مسلم يا سمح الله ,,,وانت بالمؤتمر فاجئهم واحكي انه الجمهوري جون مكين حاول يرشيك ويعطيك مبلغ عشان تنسحب من اللعبة وهاد كله كان باتفاق مع المرشحة الديمقراطية التانية هيلاري وهيك الامريكين حينتخبوك عشنك كنت صريح – وهم شعب بيموت على الصراحة- وبنفس الوقت بتقضي على امال هيلاري ومكين انهم يفكروا حتى يكونوا بمنصب رئيس بلدية ولا مجلس قروي حتى ,,,

واخر شي بحكيلك تنساش بس تصير رئيس انك تنقيلك بلد عربي محرز – سوريا مثلا – وتعمل عليه عقوبات من كل الانواع واذا احتليته كمان بيكون احسن – عشان ما تكون زحت عن نهج زعماء امريكا اللي سبقوك ’’

مصعب

كلية طب الاسنان – وهران