خبر وتعليق

نوادر فلسطينية

يالهي كم كان الشاعر المش عارف اسمه صراحة عظيم وكبير لما حكى

شعب اذا ضرب الحذاء بوجه صاح الحذاء باي ذنب اضرب

والله لازم ما ننسى  افضال  الكندرة والحذاء ودورهم الكبير في تسيير امور شعبنا العظيم .....اصلا  قبل فترة طلعتلنا الجرايد التابعة للسلطة الفلسطينية باخبار مفادها انه عبسي افندي كندرته بتسوى اكتر من 20000 دولار – وانا ما غلطت بالاصفار – يعني الاخ مش عاجبته كنادر الخليل الي الوحدة منهم بتنطش عن 50 شيكل وبتخدم سنة كاملة برجل الانسان  وما تخرب ,,,,,والكندرة كمان الها دور كبير في ردع كم واحد من العينات اللي حاطينلنا اياها محافظين ورؤساء بلديات بس كلامي مش حيكون عن الكندرة ,,,,حيكون كم تعليق على الماشي على كم شي استفزوني بصراحة

يا جماعة والله حرام اللي بيصير اليهود بيرفضوا هدنة عرضتها حماس – يا حماس ليش الهدنة يعني الله صبرك تقريبا 3 سنيين فما في أي مشكلة نصبر كمان ونطلع منتصرين بالمقياس العسكري- يعني اعمل هدنة مع اسرائيل مقابل فتح معبر طيب ليش نعمل الحسم العسكري بغزة اصلا مكان خلينا السلطة ماسكة الامور بغزة والمعابر فاتحة وصلاة النبي علينا – يعني باختصار بلش عندي شوية تحزز من موقف حماس وان شالله اللي براسي يصير بالايام الجاي عشان ما افقد الثقة بكل ولاة امور شعبنا في هاد الزمن الغريب-

بعدين بتفاجأ قبل كم يوم باقامة مهرجان فني برام الله وجايبين عليه كل المطربين الفلسطينين – هاد ازا اعتبرنا الكم واحد الي بجعروا بالاعراس وبياخدولهم الف وخمسمية شيكل مطربين – ونازلين دبكات واغاني ومن داري شو ...يعني لهون وانا معهم وحلو شعبنا يعيش بس المسخرة والمستفز بالموضوع انه اسم المهرجان مهرجان الوفاء للاسرى والمقاومة بالله عليكم ما هو مسخرة ,,,,ايش الرابط العجيب بين المقاومة وبين ابراهيم صبيحات وفتح الله مثاني ونادر ابو ليل وكل شلة المطربين على راي وزارة الثقافة تاعتنا ازا حد فيكم عرف بالله عليكم يحكيلي ’’’’

بعدين سفيرنا الهمام بمصر – نبيل عمرو ازا ما خاب ظني – بيطلع وبيصرح تصريح حلو كتير ,,,الاخ قال ايش بيخجل من الشعب الفلسطيني اللي بغزة ,,,بس لانه شعب بدو يعيش الاخ السفير بيخجل منه ,,,,والله يا شيخ احنا الي لازم نخجل انه واحد متلك فلسطيني اصلا وشكلهم الطلقين اللي اكلتهم باجرك قبل كم سنة ما جابوا اثرهم ولازمك كمان طلقين براسك يخلوك تفتخر على الاخر بالشعب الفلسطيني,,,,

واخر نوادر القيادة الفلسطينية الاخ الرئيس اللي لهلأ مش مقتنع انه اولمرت بدوش سلام ولا ما يحزنون وكل يوم قاعد بالقدس ,,,ونازل تعبيط وتبويس كالعادة ,,,,ولساته مصر على رفض الحوار مع الانقلابيين قال ايش اللي ايديهم متلطخة بدم الفلسطينيين ,,,اما اولمرت اللي نازل تعبيط فيه ايديه نظاف وعلى سنجة عشرة ومش ملطخات بالمرة بدم الفلسطينيين – جماعة بدنا نعمل حملة تبرعات عشان نجيب دش لعباس بلكي صار يتابع الاخبار ويعرف انه اسرائيل بتقتل فينا- ,,,,

يعني بعد كل هاد اكيد منظمة الدفاع عن حقوق الكنادر والبوات والنعال حترفع قضية على أي فلسطيني بيحكي انه بدو يضرب بالكندرة هاي الاشكال ,,,,والله يا جماعة الكنادر منيحة وما تستاهل هاي الاهانة

وبالاخير ما بحكي الا خليها لاله هو العالم بالحال ,,,,وبشوفكم عن قريب بمقال جديد